O le Aso Lua o le vaiaso nei e amata usuia ai i Samoa le fono faaminisita mo atunuu e 15 o le Pasefika.
O le a talanoaina ai matāupu i le tapu’eina ma le siitia o polokalame o le atina’eina o fanauiti atoa ai ma le malupuipuia o i latou poo le Early Childhood Development.
O Samoa o se tasi o atunuu muamua i le Pasefika ua mae’a faataoto lana ta’iala mo le atina’eina o le ola a’oa’oina o fanauiti i le vaega faato’ā ulufale i a’oa’oga amata.
O le tasi lea o mafua’aga autū o le usuia o lea fonotaga tele i lo tatou atunuu, ma o le taimi muamua foi lea ua talimalo ai se isi atunuu o le Pasefika i le fonotaga auā o Fiti le atunuu e tauaofia ai i tausaga uma.
O se fonotaga faaminisita o le a auai ma usugafono mai nisi o faalapotopotoga tuma’oti o loo galulue i le atina’e o a’oa’oga ma le soifua mālōlōina lelei o fanauiti i atunuu o le Pasefika.
