O le taimi muamua lenei ua lipotia mai ai faalaua’itele le tagata lea e faatumutumu iai se tasi o faalapotopotoga sili ona mata’utia o loo latou faatauina atu fuālaau faasāina i totonu o Niu Sila.
Ma e lē gata ina ta’ua le suafa o lea alii ma faailoa lona ata i luga o tusitusiga a le Stuff, ae ua faaalia ai ma ona sootaga faaleaiga i le faalavelave lea na tagatavaleina ai le Palemia o Initia.
O le suafa o lea alii o Baltej Singh, ma e 22 tausaga ua faasalaina ai i le falepuipui, ina ua ia ta’utino lona aumaia i totonu o le atunuu o le silia ma le 700 kilokalama o le ‘aisa poo le methamphetamine, o se aofa’iga pito sili ona telē lea ua maua e leoleo o lenei fuālaau faasāina.
Sa finau lava Singh i le faamasinoga ina ia tumau ona lē faailoaina i tua lona igoa, ae e pei ona lipotia e le Stuff, ua tafea lea talosaga a le alii, ma ua faailoa mai ai nei lona igoa ma foliga.
O Singh o se tagata sa faipisinisi i Aukilani, ma na talia e le Faamasinoga Maualuga lana talosaga mo le taofia o lona igoa, ina ua finau lana loia KC, o Ron Mansfield, e telē se lamatiaga o le a feagai ma le aiga o lenei alii.
O Singh o le nephew o Satwant Singh, o se tasi o leoleo poo le bodyguard a le Palemia na iai o Initia, ae o ia lena o le isi tagata e aofia ia i latou na tagatavaleina le Palemia o Indira Gandhi i le tausaga e 1984.
I se molimau tusitusia faatauto na faailoa i le faamasinoga, na ta’ua ai e le tamā o Baltej Singh, o le tagatavaleina o le Palemia na oo ai lo latou aiga i se tulaga ua matuā lauiloa ai i le lalolagi atoa i tagata Sikhs ma Hindus, ma ua latou fesaga’ia ai le tele o faiga sauā, o faamata’u ma faafefe i latou.
O lea na talia ai e le faamasino ia Justice Kiri Tahana le talosaga e taofia tumau le faailoa mai i le lautele o le suafa o lea alii e ui sa tetee iai le itu a le malo.
O le finau a loia a leoleo, Robin McCoubrey ma Pip McNabb, o la ua leva ona faailoa e le media a Initia le suafa o Beltej Singh ia latou lipoti e faafesoota’i atu ai le soligatulafono i fuālaau faasāina i le vaega na faatino e lona uncle i le tagatavaleina o le Palemia.
Sa tetee foi i ai le Stuff ma le NZME i lea faai’uga e taofia le faailoa o le suafa.
Na apili e le malo le faai’uga i le masina o Novema i le tausaga talu ai, ma aumai ai loa le faai’uga a le Faamasinoga o Talosaga ua mafai ona faailoa le suafa o Singh.
I se vaega o le faai’uga a le Faamasinoga o Talosaga na ta’ua ai, ona o le ogaoga tele o moliaga o lenei alii ma le aofa’iga tele o fuālaau faasāina sa ia aumaia i totonu o le atunuu, e telē la se tulaga e fia iloa ai e le lautele ina ia mafai ona malamalama uma i vaega na aofia ai, faatasi ai ma lo latou fia iloa o le tagata moni lea o Singh.
E tusa ai ma su’esu’ega i moliaga na aafia ai lenei alii faipisinisi, o ia tonu lea na la’u maia i totonu o Niu Sila le anoanoa’i o pusa oloa tetele na la’u mai ai apainu, o apa pia, o isi o apa faapea o suāniu, mulimuli ane o na apa o le ‘aisa sa aumai faasuavaia ma le faamoemoe e faato’a iinei ma nutililii ai mo le faatauina atu.
Na tula’i mai ai se faalavelave na ma’umau ai le soifua o se tasi o alo talavou o Samoa, o Aidan Sagala, ina ua ia inu sesē se apa pia, le Honey Bear na tuu atu iai e se tasi sa la faigaluega faatasi, peita’i o lea apa pia sa iai le ‘aisa faasuavaia, ma na maliu ai lea alo o le atunuu.
Na faia su’esu’ega a leoleo ma i nai aso mulimuli ane talu ona iai Sagala i le falema’i, ae maua e leoleo le alii lenei o Singh i le malae vaalele i Aukilani ua sauni e malaga atu i Dubai, ma loka mai ai loa.
E tele vaega eseese o fuālaau faasāina ma le anoanoa’i o tinoitupe na maua iai i lea alii, ma o lea ua tuli nei lona faasalaga faafalepuipui.
Puna o Faamatalaga: https://www.stuff.co.nz/nz-news/360955308/family-history-behind-nzs-biggest-meth-importer-and-why-he-can-now-be-named
