Ua toe faaui i tua le tagi a lē sa avea ma Fofoga Fetelai o le Palemene, Susuga Papalii Liʻo Ta’eu Masepaʻu faasaga ia Namulauulu Sami Leota, faapea foi le tagi a Namulauulu faasaga ia Papalii i le taeao nei i le Faamasinoga Maualuga.
O le aso 30 o le masina nei lea ua poloa’ia e le Faamasinoga e toe aumai ai le matāupu mo le aloa’ia o le faaui i tua i le mae’a ona faasalalau aloa’ia o le tulaga ua autasi iai itu faamasinoga o lea matāupu e pei ona latou faailoa atu i le Faamasinoga Maualuga.
Hon Papalii Li’o Ta’eu Masepa’u
Namulauulu Sami Leota
O le itumalo faapalota o Faasaleleaga Numera 3 ua tolu iai itumalo ua toe faaui i tua tagi o Palota ina ua masuiga mālie matāupu i le va o itu faamasinoga, o nisi o matāupu o loo atagia ai le tuualalo a itumalo ina ia tilotilo i le nofo filemu o nuu ma afio’aga i le va o tagata i totonu o le itumalo aemaise ai o tofi maualuga o le Palemene ua umia e nisi.
O le taeao nei ua faailoa ai foi le fetuunaʻi ai e le Faamasinoga o tagi o le Palota a le itumalo o Falealili Nu 1 i le va o le Sui Palemia, Afioga Toelupe Maoiautele Poumulinuku Onesemo ma Tuiloma Tusa Lancelot Lameko i le Aso Tofi o le vaiaso nei e valaau ai.
O le taimi nei o loo faagasolo molimau e 17 o le matāupu i le tagi (counter petition) a Seve Te’i Fuimaono faasaga ia Leaana Ronnie Posini mo le itumalo o Safata 1.
O lea matāupu sa amatalia i le vaiaso ua mavae lea ua faaauau mai i le vaiaso nei.
E tusa ma matāupu e fā lea ua faagasolo iai galuega a le Faamasinoga Maualuga, e tolu matāupu ua ave i tua ae tasi o loo iai i iloiloiga a le Faamasinoga i le taimi nei.
O le isi fā lea o loo totoe o le a aga’i mai isi i le vaiaso nei ma faaauau atu i le vaiaso o lumana’i ai.
