E 21 itumalo ua sainia maliega mo le talaina i tua o le 160,000 muamua o la latou miliona lona lua ina ua mae’a ai ona tuuina atu uma lipoti o le faaaogāina o le miliona muamua.
Na faaalia e le tamaitai Minisita o le Matagaluega o Tina ma Tamaitai Atinae o Afioaga ma Aga Fesootai, Afioga Mulipola Anarosa Ale Molioo sa fuafua lava e oo atu i le 25 itumalo e saini a latou maliega i le aso ananafi peitai o nai tulaga laiti e lei mae’a na mafua ai ona lē atoa lea numera.
Ua iai le faamoemoe o le masina nei o loo faatulaga mai ai e le matagaluega e tatau ona tuuina atu ai lipoti o le faaaogāina o le 160,000 atoa ai ma fuafuaga faataatia ona mafai lea ona sainia i le masina o Mati le 420,000 muamua ae o le a faamae’a mai le isi 420,000 ia Iuni o le tausaga nei.
