Ua toe siitia le numera o tagata i Samoa ua pesia i le siama o le faama’i Koviti-19 ina ua aumai le isi lipoti lata mai o le tulaga o loo iai le salalau i le lautele o le atunuu o le faama’i.
O le lipoti o le aso 9 i le aso 11 o Iuni ua faailoa ai e to’a 107 isi gasegase fou e aofia ai le tagata malaga mai fafo e to’atasi. Ua faamauina ai nei le 14,422 o tagata i le atunuu ua aafia i le siama e aofia ai pasese mai fafo e 111. O le lipoti lata mai lenei o faamaumauga o le pipisi o le faama’i mai le Aso Tofi i le Aso Toonai o le vaiaso na te’a nei.
O loo tumau pea i le 28 le numera o ē ua maliliu i āuga o le Koviti-19 poo le korona vairusi, ae o le aofaiga o su’ega poo test ua mae’a ona faatino e 135,820.
