Ua molimauina le amata tala i lalo o le maota o le Maliu Mai i Fugalei sa faagaioia ai se pisinisi o se fale faafiafia ma se fale’aiga, ona o se faai’uga a le faamasinoga. O se aiga mai Amerika Samoa sa lisiina le fanua mo se vaitaimi ua silia ma le 17 tausaga ina ua mae’a ona sainia se maliega ma lē e ana le fanua i le masina o Setema o le tausaga e 2004.
O le tausaga e 2020 na amata faaletonu ai le totogiina o le lisi ma faia ai se avea’i e tusa o ala o le tulafono e faamuta le toe faaaogāina e Mapu Saei Jamias ma Iliganoa Sooialo o Pago Pago Amerika Samoa le toe faaaogāina o le eleele, ma ia aveesea uma a latou meatotino e pei o fale, ma ia lē toe nofoia e se isi.
Na tuanai lea aiaiga ae e le’i usitaia, ma taunuu ai loa se finauga a lē e ana le meatotino i le faamasinoga na talosagaina ai se poloa’iga e aveesea faamalosi ai poo se eviction order. Ae o lea finauga na faato’ai ai foi ma se talosaga a le aiga na lisiina le fanua ina ia totogi atu e lē ua talosaga e aveesea faamalosi i latou se tinoitupe e tusa ma le tasi le miliona, 580 afe tala ($1,058,000.00).
O le finauga a le aiga o latou na tanuina le fanua ona o faataufusi, ma fausia ai fale sa faatino ai le latou pisinisi. Peitai sa finau atu le aiga e ana le eleele, latou te le’i fesoota’i ma le aiga i le galuega na latou faia ma e le’i iai so latou silafia e le’i iai foi se maliega.
Ua faamalieina le faamasinoga i le finauga tetee a le aiga e ana le meatotino ma ua lē talia ai le talosaga mo le totogiina atu o lea tupe tele i le tanuina o le fanua ma le fausia o fale ua tutū ai i le eleele, ma ua poloaina ai le aiga sa lisi i le fanua e tala ese uma o latou fale ma solomuli ese e lē tatau ona toe nofoia le ogaeleele sa latou lisiina.
