O se fautuaga tāua mo pasese uma e tuua le malaevaalele faavaomalo i Faleolo, le tatau ona usita’i i aiaiga o tulafono e tausia ai le saogalemu o faigāmalaga uma a soo se kamupani vaalele o afea Samoa.
Ua mafua lea fautuaga tāua mai se tasi o tagata faigaluega sinia i se kamupani vaalele o loo malaga mai i Samoa, ona o se pasese o se tamaitai na toe foi i lo latou aiga e le’i mafai ona ulufale i le vaalele i se malaga a le Qantas sa faatulaga e tuua ai Samoa mo Brisbane i Ausetalia i le Aso Lua o le vaiaso nei.
Faaalia e lea molimau faatuatuaina o le taimi na siaki ai ato e ave i luga o le vaalele na fai ai se tala faaulaula i le fia mālie o lea pasese e faapea o loo iai se fana pomu i totonu o lana ato.
Na fai lea tala o lona fia mālie ae na faaalia e le molimau e lē o toe faatamala le puipuiga o le saogalemu, ma sa logotala le pailate o le vaa i lea tulaga ma faia ai le faai’uga e lē avea lea pasese.
O lea tamaitai e pei ona faailoa e le molimau, sa faatulaga e malaga mo se avanoa faigaluega faavaitaimi.
O le siaki sa faia i le ato a lea tamaitai e sa’ili ai faguvai ma toothpaste ma fagu’u ulu o Gel, lea e lē faatagaina ona ave i luga o le vaega o nonofo ai pasese.
E ui e leai ni vaega faapea na maua i le ato a lea tamaitai ae o lana tala faaulaula fia mālie i le fana pomu sa lē mafai ai ona ave e le vaalele.
