Ua alu le uluai malaga misiona a le malo o loo taitaia e le sui Palemia Carmel Sepuloni i le Pasefika.
O Sepuloni o ia foi o le minisita lagolago o le va i fafo mo le Pasefika ma o ananafi lea na tuuvaa ese atu ai e faamoemoe mo Solomona, Fiti faapea Tonga.
O se avanoa e saga faamalosia ai faiga faapaaga i le va o Niu Sila ma atunuu Pasefika nei ma na saunoa Sepuloni o se tasi lenei o faamuamua a le malo.
O talanoaga e faatatau i suiga i le tau o se tasi o mataupu tāua o le a lotea i lenei faigamalaga, o luitau o loo ui ai tamaoaiga o le Pasefika aemaise le aotelega o mataupu tau atina’e.
O le malaga muamua lenei faamisiona a le malo agai i le Pasefika talu mai taimi na tapunipuni ai ona o le Koviti ma o loo malaga faatasi le sui Palemia ma le minisita o tagata Pasefika, Barbara Edmonds, minisita o suiga o le tau James Shaw faapea nisi o taitai o le komiuniti.
