Ua lē faailoaina e le afioga i le Fofoga Fetalai o le Palemene le suafa o se sui usufono ua tuua’ia i le faia o ni faasalalauga ua foliga ua taitai sese ai le atunuu.

O se pepa o faamatalaga mai le ofisa o le Fofoga Fetalai susuga Papalii Li’o Oloipola Ta’eu Masipa’u o loo aumai ai i se tulaga faalauaitele sona finagalo i lea sui usufono i ni ona manatu ua ta’u faatauvaaina ai le mamalu o le Palemene.

Faaalia e Papalii i lea pepa o faamatalaga, ua faafagogo tagiao le taumafai pea o lea sui usufono e fai saunoaga ma lafoga faalumaluma i auala o fesootaiga ma o sona faanoanoaga lea ona o lea tagata o se sui usufono o le Palemene ae ua toe vaemanua ai tulaga mamalu o sui usufono ma o latou itumalo.

Ua faailoa foi e le Fofoga Fetalai o le afioga i le Ao o le Malo ua aofia i le Palemene e tusa o aiaiga o le Tulafono Faavae ae ua satia atu ai lona mamalu ma le faaaloalogia i saunoaga ma manatu o lea sui usufono.

Ua faamanino mai e le susuga Papalii, o le Palemene na te fausia tulafono, ae o le faamasinoga e faauigaina tulafono ma ua tumavaevae ia tiute o itutino fefaatauagai, i le va o le Palemene, Faamasinoga ma le Fono Faatonu.

Ua faailoa foi e Papalii o le Fofoga Fetalai o se tasi o tofiga taualoa faalefaavae, ae ua foliga mai i saunoaga ma manatu o lea sui usufono i auala o fesootaiga, ua na le faatāua le mamalu o le tofiga ae ua osofai le itumalo ma le tagata o loo umia le tofiga i ona manatu faaalia. 

O se vaega o le finagalo tusitusia o le Fofoga Fetalai i le pepa o faamatalaga e faitauina faapenei:

“O Faaiuga a le Faamasinoga mamalu o le tulafono lava lea, peitai ua matauina e pei ua faatalasua e lea sui usufono, le faatusatusa o faaiuga a le faamasinoga ma faaiuga fai a le Palemene, ona pei lea ua atagia mai, ua sili le isi itutino i le isi itutino. Ae o loo manino lava le taotoga o vaega ia.”