O le afioga i le Faamasino Sili le afioga Satiu Simativa Perese o loo ta’ita’ia le usugafono a le faamasinoga a Samoa i le faatasiga ma faamasino o le faamasinoga a Niu Sila e fetufaa’i ai faamasinoga e lua i auala e faaleleia ai le galuega aemaise o le fetufaa’i o alii ma tamaitai faamasino i auala e fesoasoani ai i le latou galuega tau faamasino.
O nisi o faamasino mai le Faamasinoga Faaitumalo a le atunuu o loo auai i lea faatasiga o le afioga Leota Raymond Schuster, ma le afioga Loau Donald Kerslake, ma tamaitai faamasino le afioga Talasa Atoa Saaga ma le afioga Alalatoa Rosella Papalii.
O le faai’uga o le vaiaso na taunuu ai le usugafono a le faamasinoga a Samoa lea o loo malaga ai ma nisi o ofisa sinia o le matāgaluega o faamasinoga ma le faafoeina o mataupu tau faamasinoga, ma o le vaiaso atoa lenei o loo faagasolo ai lea fetufaa’iga, sa talimalo muamua ai le faamasinoga a Samoa i le tausaga e 2023.
