O le sui faipule o le itumalo palota o Faleata 4 le tofa i le Igoamatua ia Ale Vena Ale, ua fai ma sui o le afioga i le Fofoga Fetalai o le Palemene na te ta’ita’ia le usugafono a Samoa i le fono a Fofoga Fetalai o Palemene o Malo o le Taupulega, e usuia i Toronto le laumua o le atunuu o Kanata.
Ua faaalia e le Fofoga Fetalai le susuga Papalii Li’o Oloipola Ta’eu Masipa’u, ua lē avanoa o ia i le fonotaga ona o le Aso Lua asau e usuia ai le Palemene mo ana fonotaga faaauau, ma ua lē avanoa foi le Sui Fofoga Fetalai ona o loo toesea i atunuu i fafo, o le mafuaaga lea ua ia filifilia ai le faipule o Faleata Numera 4 e fai ma ona sui ma ta’ita’ia foi le usugafono a Samoa i lea faatasiga tele, o se taimi muamua ua toe tauaofia ai talu ona tapunia malaga faavaomalo ona o le faama’i.
O le Aso Tofi na tuua ai le atunuu e le aumalaga ma mālōlō ai i Aukilani i Niu Sila, ma faamoemoe ai e tuua Aotearoa mo Kanata i le faai’uga o lenei vaiaso.
O loo malaga faatasi le faipule o Faleata 4 ma sui faipule e to’alua e aofia ai le Minisita lagolago o le faipule o Lefaga ma Faleaseela le tofa Masinalupe Makesi Masinalupe, ma le faipule tamaitai le afioga Faagasealii Sapoa Feagia’i.
