O se taaloga o loo faia i isi atunuu ae o Samoa o le taimi muamua  lenei o le a faia ai lea taaloga e saili ai le tagata pito sili ona malosi.

Ua faaigoaina lea tausinioga e faia i le Aso Toonai le faaiuga o lenei vaiaso o le Samoa’s Mightiest Heroes, ma o le a tausinio ai alii ma tamaitai.

Ua faailoa e i latou o loo tapenaina lea faamoemoe tau taaloga o le a saili le tagata sili ona malosi i le siiina o le taga oneone mamafatu ma le maa mamafa lapotopoto o le kelope o le lalolagi.

O loo tapenaina lenei faamoemoe e le susuga Misa Peter Anae o se tasi e taalo ai, ma ua ia faaalia o loo fau fau mālie lava lenei taaloga i le atunuu i le faamoemoe e toatele nisi e fiafia iai.

O le taimi muamua la o lenei taaloga e pei ona o le a faia i le Aso Toonai nei, ua iai tagata ua mae’a ona lesitala e fia auai e aofia ai ma nisi o le a malaga mai Amerika Samoa.

O le itu mataina i le uluai tausinioga i Samoa ona o lea ua iai ma nisi o le itupa o tamaitai e fia auai i le naunau e saili poo fea le maualuga o loo iai lo latou malosi.

O le avamalosi o le Taula ma le kamupani telefoni ma fesootaiga o le Digicel o loo lagolagoina lea tausinioga.

O le 10 i le taeao o le Aso Toonai i le fale koleni o le Crossfit Fatu Toa i Vaitele o le a faia ai lenei taaloga.