E maualuga le alofa tula’i o le mamalu o Samoa o alala i Amerika, i latou sa faatalia, ma tapua’ia le masii atu o le aulakapi ta’ito’afitu a le Manu Samoa i le vae o le taamilosaga i Los Angeles, ia latou faaaloaloga e ala i seleni na fai meaalofa ai i le pulega ma tama o le aulakapi ta’ito’afitu a le atunuu.
O ni faaaloaloga e pei ona sa molimauina i faasalalauga tuusa’o mai i luga o le api o foliga le facebook, na tofu ai tama o le ‘au e oo i le pulega ma teutusi ta’i afe tala Amerika, ae o le sasaa o isi seleni e tauala i siva Samoa mo tama o le tatou aulakapi ta’ito’afitu.
Ua atili maualuga le faaaloalo a le Mamalu o Samoa i lea vaega o le lalolagi, i le maualuga tele o le tulaga sa iai le taumafai o le tatou ‘au, ona na faato’ā malolo lava i le vaega o semi finals, ae toetoe taunuu i le sailiga o le siamupini o le vae o le taamilosaga i Los Angeles, lea ua sola ma le aulakapi ta’ito’afitu a Niu Sila.
O Samoa ua tulaga fā i le vae ua mae’a nei, ae ua saofa’i nei i le tulaga iva i le faatulagana o ‘au mo atunuu o loo auai i le taamilosaga.
O Ausetalia o loo numera muamua, pito i ai Aferika i Saute i le tulaga lua, tulaga tolu o loo tietie ai Fiti, o le ‘au ta’ito’afitu a Argentina o loo i le tulaga 4, Aialani i le tulaga 5, Amerika i le tulaga 6, tulaga fitu o loo saofa’i ai Farani, tulaga valu Niu Sila, Samoa i le tulaga iva ma Egelani i le tulaga 10.
