Ua maea le uluai asiasiga a le Minisita o le Matagaluega o le Soifua Maloloina na silasila ai i tulaga o loo iai le auaunaga a lea matagaluega a le Mālō i le motu o Upolu faapea le motu tele i Salafai.

Faaalia e le Minisita o le Soifua Maloloina afioga Valasi Luapitofanua Toogamaga Tafito Selesele e manaomia pea le faaleleia o lea tautua i le atunuu atoa ona o le faamuamua foi lea a le faigamalo fou e pei ona sa latou folafola e ala i faalauiloa ao lumanai le palota tele a le atunuu.

Taua e Valasi “E faafetaia foi i taumafaiga  a le faigamalo talu ai, ta te manatua foi le Matagaluega lenei e lē tasi se mea e silasila iai se o’u te faiatu e tele mea e fia faaleleia, e le gata i totoga o falemai, i ni masini faaaogaina akoakoa ga lelei ae faapea le aufaigaluega”.

O le manatu maualuga lava o le alii Minisita ina ia faatino lelei galuega a le Alii ma tamaitai fomai. O le taimi nei o loo ave pea le faamuamua i le faatinoga o tui puipui mo le Koviti ma i le silasila a Valasi e matuā lelei lava le faatinoga o le faagasologa o lea polokalame.

Taua foi e le afioga i le Minisita vaega o loo manaomia ai le toe faaleleia “E le tasi se mea e fia faaleleia, e iai falemai i Savaii e moomia le faia o le fale o le fomai, e moomia le faia o le fale a tamaitai tausi soifua, e moomia le faaleleia ma le faaopoopoga, o mea uma a nei ua maea ona faataoto e le Mālō talu ai pau lava le vaega to toe o le faatino ma vaai vaega e toe faaleleia”.

O nei asiga a le faauluuluga o lenei matagaluega ina ia manino ai vaega o loo manaomia ai le toe faaleleia o lea auaunaga aua le tautuaina o tagata Samoa o loo maua i soo se gasegase.