O lea ua faamaonia mai e leoleo i Sini e moni sa iai tamaiti aoga o le tausaga tasi ma le lua i totonu o se potuaoga na alu atu sa’o iai se pulufana i le faamalama a o faia le aoga i le Aso Lua o le vaiaso nei i se aoga i le itu i Saute i Sisifo o Sini.
O le aoauli o le asō lea o loo ta’ua e le ausuesue i le Macquarie Fields Public School i le lata i le tasi i le aoauli, ae fai mai e le o se osofaiga na faia agai atu i le aoga ma e lei iai se tasi o faiaoga ma tamaiti aoga na aafia ai.
O le faamatalaga a le leoleo e lei malosi tele le tau o le pulu i le faamalama ma o se gaioiga le talafeagai tele lenei ma e foliga e mamao teisi ese le vaega na fanaina ane ai lea pulu lea o loo faia nei iai suesuega a leoleo.
Ua talosagaina ai e leoleo le fesoasoani a nisi o le atunuu e silafia ni faamatalaga i le mataupu lenei ae ua molimau nisi o mātua o tamaiti i le aoga, o se tulaga faapopole tagata tele ua tulai mai ma e ao ona silasila toto’a iai leoleo mo le saogalemu o le fanau.
