Fai mai ua sola i Lusia le ta’ita’i sa iai o Suria o Bashar Al Assad ma lona aiga ina ua lē mafai ona tali atu i le itu tetee, le Rebels lea ua o latou fāoa le atunuu mai lalo o lana ta’ita’iga.
Ua ta’ua i le CNN se faamatalaga mai le ta’ita’i o le itu tetee lea o Abu Mohammad al Jolani, fai mai a ia o le pa’ū o le faigamalo a Assad o se manumālō lea mo le atunuu atoa o tagata Isalama.
Ua lipotia ua silia ma le 50 tausaga o iai Suria i lalo o le pule’aga a le aiga o Assad ma ua lipotia foi le faia o se faatonuga a le Palemia o Isaraelu, Benjamin Netanyahu i lana militeli ina ia fāoa le buffer zone poo le nofoaga o loo va ai le Golan Heights lea e nofoia e Isaraelu ma isi vaega o Suria.
O le ulua’i taimi lea o le a faatulaga ai ni vaega’au a Isaraelu i le buffer zone lea talu mai le 1974 sa iai ai se maliega i le va o Isaraelu ma Suria.
Na saunoa foi Netanyahu o le pa’ū o le faigamalo a Assad i Suria o se i’uga lea o faiga a Isaraelu faasaga ia Iran faapea ma le vaega a le Hezbollah i Lepanona ma o se aso tāua i le talafaasolopito o Sasae Tutotonu.
Puna o Faamatalaga: https://edition.cnn.com/world/live-news/syria-civil-war-12-08-2024/index.html
