O le Peresetene o loo iai nei o Suria o Ahmed Al Sharaa ua malaga atu nei i Moscow e feiloa’i ma le ta’ita’i o lea atunuu Vladimir Putin.
O le la ulua’i feiloa’iga faafesaga’i lea talu ona tula’i mai Sharaa i le tofi.
E faate’ia nisi i lea feiloa’iga aemaise ona o Putin sa lagolago malosi i le faigāmalo sa iai talu ai i Suria sa ta’ita’ia e Bashaar Al Assad lea na faato’ilaloina e le vaega a le Rebels ia Tesema o le tausaga talu ai.
Ua ta’ua i lipoti se faamatalaga a Putin e faapea, ua silia ma le 80 tausaga o le faigauō a Lusia ma Suria ma e le’i iai lava se taimi ua faalavelavea ai lea faigauō i ni faiga faapolokiki.
Saunoa Al Sharaa o le taimi nei ua toe tau amata ona toe faatulaga sootaga ma isi atunuu o le lalolagi aemaise Lusia.
Saunoa le Sui Palemia o Lusia, Alexander Novak ua sauni foi lona atunuu e saunia le lagolago ma le fesoasoani o loo mana’omia e Suria mo le toe faatulagaina lelei o lona atunuu.
Puna o Faamatalaga: https://edition.cnn.com/2025/10/15/world/syria-al-sharaa-putin-moscow-visit-intl
