O le asō o loo taumafai ai le susuga i le faafeagaiga o le ekalesia ma lona faletua, Pastors Ailaulau & Nancy Faletutulu, ina ia toe taunuu i lo la aiga aemaise le ekalesia i Napier, ona e tetele lologa na aafia ai le faaitu lea i Hawkes Bay i Hastings ma Napier, ae o loo iai le faifeau ma le faletua i Ueligitone, ma e lei mafai ona toe malaga ane.
Peitai o le sulufai ane o nai tagata faigaluega i galuega faavaitaimi le RSE i le hall a le ekalesia mo se apitaga ina ua afatia o latou fale i le afā ma lologa, o lea na taulamua ai le alo o le faafeagaiga, le susuga Pas Charles Faletutulu, e faaulufale nai nei tagata mafatia e silia ma le 400 ina ia mapu atu i le maota tele o meafai a le ekalesia mo se mapusaga ma se apitaga i taimi o faalavelave faafuasei.
O i latou uma nei e aofia ai nai tagata galulue mai Vanuatu, le Atu Solomona, Papua Niu Kini ma Samoa. Na amata mai le toa 100 tagata na sulufai atu, ae oo ane ananafi ua silia ma le toa 400 i latou sa faaauau pea ona gasolosolo atu i le maota o le ekalesia ina ua le mafai ona toe saogalemu i o latou fale sa faamautu ai.
E 2 aso o motusia le eletise mai nofoaga sa iai, ae e maeu le faagaeetia ona i le lotolotoi o nei mafatiaga ogaoga ua lamatia ai ola o nei fanau, ae sa faalogoina lava le pepese ma tatalo o nai nei alo ma tamafanau o le Pasefika i le latou pese, “I know the Lord will make a way for me”.
O loo galulue le missionary brother Tauese ma Ps Charles i le galulue malosi e le gata i galuega laveai mo le tausiga i le tino ae faasili lava i le fesoasoani faaleagaga mo le faato’afilemuina o nai tagata ma aiga ua afaina. Sa taumafai malosi e faaaoga poo a lava ni mea o totoe ia latou e ola ai, faatasi ai ma le tele o fesoasoani mai nai aiga o le ekalesia.
O le faafaigata ona o loo motusia fesootaiga mai Hastings ma o loo faamoemoe ia oo atu i se taimi o le asō ua maua atu nisi fesoasoani i faamalū ma isi mea moomia faapena. Ua mafai ona maua sina fesoasoani mai se transformer e faamumū ai se moli ona o loo motusia pea le eletise.
O saimigi ma araisa o loo maua ai ni meaai i le taimi nei e faatalitali ai se taimi e oo atu ai nisi sapalai o meataumafa. O nisi o loo faaaogā a latou taavale e fafaga ai a latou telefoni ma mafai ai ona pue mai ata video e pei ona silasila atu i ai.
Na tusia e Talalelei Taufale i luga o lana facebook, ‘na tafe ifo o’u loimata a o o’u faalogo atu i le pepese mai a nai nei tagata faigaluega RSE i le pogisa o le po anapo.’
E mafai ona tagai ane i le itulau o le facebook a le ekalesia Kings House Church e maua ai nisi faamatalaga atili i le galuega laveai o loo faatino e le ekalesia mo nai tagata ua afatia. O lea foi ua faailoa atu i lalo le numera o le bank account ua saunia e le ekalesia mo i latou e fia faia ni foai tau seleni e lagolago atu ai mo le tausiga o nei uso a tagata.
Napier & Hastings Samoan Assembly of God Community Trust
38-9009-0297745-00
Ref: Gabrielle relief
