E tele suiga ua fai mai le Labour e na te faia i fefaatauaiga o vape products pe a toe tu mai.
O lea e 7,130 faleoloa o loo faatauina vape products i le taimi nei i totonu o Niu Sila, peitai o lea o le a faaitiitia i le na o le 600 faleoloa ma o le a moomia foi le laisene e mafai ai ona faatauina oloa nei.
E lē gata i lea o le a sii i le $15,000 le faasalaga tupe mo pisinisi o loo faatauina vapes i tupulaga e i lalo o le 18 tausaga.
O se tala fiafia lea i le Vape Free Kids NZ lea faatoa tuuina atu i le malo la latou petition i le vaiaso ua tea e faatalosagaina ai le malo e faia se suiga vave ona ua tele le aafiaga o fanau i le vape.
Ae mai le aufaipisinisi, e lē o fiafia i lenei tala ona ua fai mai o le a leai ai ni galuega a le faitau afe ma gau ai le tele o pisinisi.
I le fesiligia ai o le minisita o le soifua maloloina Dr Ayesha Verrall pe o ona silafiaina e toafia tagata o le a leai ai ni galuega mai le suiga ua fuafua, tali le minisita o le toatele o faleoloa e lē faapea na o vape products o faatau ai.
O ni fuafuaga faataatitia e fua uma i le faaiuga o le palota tele ia Oketopa.
