Ua iai le suiga i le fuainumera o sauaga o loo fetaia’i ma tagata faigaluega i le emergency department a le falemai i Middlemore i Aukilani talu ona faaopoopo sikulati mo leoleoga.

O le masina talu ai na faasilasila mai ai e le minisita o le soifua maloloina, Dr Shane Reti o le a faaopoopo sikulati e leoina EDs poo emergency department seia oo i le faaiuga o Fepuari.

O lea na sau ai ma le falemai a Middlemore i lalo o le valu ED e maualuga le lamatia ma o lea na faaopoopo ai le toalima sikulati, a o isi ED e 24 e i le va o le 2 ma le 5 sikulati faaopoopo.

Talu ona faia lea suiga ua molimau mai le sui o le pulega a le falemai i Middlemore, Dr Andew Connolly e na o le 13 mataupu tau sauaga na faamauina i le masina talu ai, ma o se pa’ū tele lea mai le 22 na iai i le masina o Tesema o le 2022.

Peitai i nei taumafaiga uma e lē o aveesea ai lava faamatalaga soona lafo nei e afaina ai le aufaigaluega e tusa ma molimau a le peresetene o le sosaiete o tausimai i Niu Sila, Anne Daniels e mafua lava lea i taimi e lē fiafia ai tagata o loo sulu atu ona o le umi tele ona tatali o le fomai.

Ua toe talosaga ai le peresetene e moomia lava le faaopoopo o le aufaigaluega ina ia vave ona tali manaoga o tagata lautele o loo sulu atu mo se fesoasoani.