O suiga o loo faaofi atu mo le tulafono i le ‘avamalosi, o se suiga o le a fiafia ai komiuniti a le Pasefika aemaise foi i pisinisi laiti i totonu o Niu Sila.
O nei suiga i le tulafono o le a mafai ai ona tatala pa pia i aso mālōlō o le ANZAC day ma le Eseta, o le a fesoasoani foi i pisinisi e tautuaina tagata i ia matātā, aemaise o le a tele ai avanoa e potopoto ai tagata e fiafia i taaloga e faia i ia aso mālōlō ma faai’uga uumi o le vaiaso.
O taimi o faai’uga uumi o vaiaso ma taimi o taaloga, o avanoa ia mo tagata o le Pasefika e faatasitasi ai ma fai mai nisi, o tulafono a Niu Sila o loo iai nei mo le ‘avamalosi ua taofiofia ai i latou mai le olioli i na faai’uga uumi o vaiaso ma taimi o taaloga.
O le vaiaso talu ai na pasia ai le faitauga lona lua o le tulafono tau faaofi e toe teuteuina ai le Sale and Supply of Alcohol (Sales on Anzac Day Morning, Good Friday, Easter Sunday, and Christmas Day) .
Ma afai o le a pasia lea tulafono tau faaofi, o le a mafai ai loa ona tatala pa pia i tua atu o le vaeluaga o le po i aso o le ANZAC ma aso mālōlō o le Eseta.
O se manatu o le faipule o le lisi mo le vaega faaupufai a le ACT, Cameron Luxton ina ua faatalanoa i le Pacific Mornings, na ia ta’ua ai, o tulafono o loo iai nei, ua tele le saisaitia ma tele ai le nunumi lē talafeagai.
Ua tele nauā tulafono ua saisaitia ai le faatinoga o pisinisi, aemaise lava pe a aafia ai faafiafiaga ma le ‘avamalosi, ma tele le fenumia’i ma misia ai ni avanoa e faatino ai pisinisi.
O le tausaga nei, e pa’ū tonu le ANZAC day i le Aso Toona’i, ae o le faai’uga foi o le vaiaso lena e talimalo ai Kalaiesetete i le Super Rugby Pacific Round, lea e lima taaloga e fai ai mai le po o le Aso Faraile e oo i le Aso Sa.
Fai mai la Luxton, e mana’omia ona fai le faitauga faai’u o le tulafono taufaaofi i le Palemene i le aso muamua o Aperila, ina ia mafai ai e le aai o Kalaiesetete ona matuā matagofie lana taligāmalo i lena weekend pe a toe fetuuna’i suiga o le a iai i taimi e tatala ai na nofoaga tāua i taimi faapena.
Puna o Faamatalaga: https://pmn.co.nz/read/political/liquor-law-changes-could-lift-pacific-communities-small-businesses
