O le toesea o tupe a nisi o le au matutua ua penisione a le Faalapotopotoga a le NPF na molia ai se alii sa galue i lea faalapotopotoga a le Mālō i ni moliaga e 265.
O le valaauina o le mataupu lenei mo le amatalia o suesuega a le faamasinoga i molimau a leoleo ae faailoa ai e le Loia le afioga Afamasaga Michael Soonalole o loo tulai mo le alii o Etuale Ioane ua suia le tali tetee a lea alii i lona ioeina uma o moliaga faasaga ia te ia.
Ua faailoa i faamaumauga a le itu a leoleo o nisi o tupe na toesea a le vaega o penisione a le NPF o seleni a nisi o le au matutua ua maliliu. O lona uiga ua maliu ae o loo tala lava le faamanuiaga.
Faaalia i faamaumauga a Leoleo e silia i le $143,000 le tino i tupe o loo aafia i lenei solitulafono.
O le afioga i le Faamasino Sili le afioga ia Satiu Simativa Perese na tauaveina lenei mataupu mo le suesueina o molimau peitai o le suia ai o le tali tetee a Etuale i le tali ioe ua tolopo ai nei i le Aso 3 o Novema e lau ai se faaiuga.
