O tapenaga a le Malo i le tuuina atu o nisi o tulafono taufaaofi i le fono aoao faitulafono o le a toe usuia i le masina faai’u o lenei tausaga, ua suia ai le aso e tauaofia ai le fono usu a le atunuu.
Ua faamaonia mai e le afioga i le Fofoga Fetalai, Susuga Papalii Li’o Oloipola Ta’eu Masipa’u lea suiga e pei ona o le a tauaofia ai i le aso 17 o Tesema le Aso Lua o le vaiaso a sau, ae ua lē o le Aso Lua 24 o Tesema e pei ona sa faailoa i le mae’a o le tauaofiaga i le masina o Setema.
O se tasi o tulafono taufaaofi o le a tuuina atu i le fono faai’u o lenei tausaga, o teuteuga ia o le tulafono o faigapalota ma o le Aso Gafua o le vaiaso fou e tuuina atu ai teuteuga o lea tulafono i le soalaupulega masani a sui mamalu o le Palemene le pre-sitting, a o le’i faataatiaina aloa’ia teuteuga o le tulafono o faigapalota i le Maota Fono.
Ua faailoa mai foi e le Fofoga Fetalai o le a leai se tala faaopoopo o le tupe poo le supplementary budget e faataatia ai i le fono mulimuli o lenei tausaga.
O le tala autū o le tupe lea na faataatia ia Iuni o le tausaga nei e lei aofia ai foi se tala faaopoopo o le tupe.
