Ua taoto nei i le Faamasinoga Maualuga a le atunuu molimau tusitusia faatautō, a nisi o matai ma tagata o le nuu o Leauvaa, ua latou faailoa ai gaioiga na faaleaga ai a latou meatotino i fanua o loo latou nofoia, lea o loo mafua ai le talosaga ua iloilo nei ua lē usitaia e Alii ma Faipule o le nuu o Afega le poloa’iga a le Faamasinoga Sili, sa poloa’iina ai le taofia o le toe faia o nisi galuega i fanua o loo tula’i mai ai se feteena’iga ma le nuu o Leauvaa.
O taualumaga o le mataupu lenei tau faamasinoga i le Aso Tofi o lenei vaiaso, e leai ni molimau a le itu o loo faasaga iai moliaga, ma avanoa ai loa ona tuuina atu folasaga ma finauga faaletulafono a loia a itu auai.
A o le’i faia lea vaega o le faamasinoga, sa muamua fofogaina le talosaga a loia mo Afega sa finau ai e faasee ese le afioga i le Faamasino Sili ma le tauaveina o iloiloga o moliaga o le lē usitai i le poloa’iga, sa iloilo ai foi ma se talosaga mo nisi o matai o Afega o loo ta’ua suafa i tuua’iga a nisi o aiga o Leauvaa ina ia auai i le iloiloga poo le joinder.
O ia talosaga uma e lua ua teena ma o le a aumai i le faai’uga autū mafuaaga.
O tulaga sa aliali mai ai ni vevesi i se mataupu tau faamasinoga i le Faamasinoga o Fanua ma Suafa talu ai nei, lea sa auai itu mai le afio’aga o Afega, Leauvaa ma Tuanai, sa oo iai se finagalo o le Faamasino Sili le afioga Satiu Simativa Perese.
Na saunoa le afioga i le Faamasino Sili a o le’i amatalia iloiloga o moliaga o le lē usitai i le poloa’iga, a iai se isi o itu tau faamasinoga e faamanu’alia le finagalo i ni mau o le a fofogaina, e tatau ona tuua loa le potu faamasino.
Ae afai ae aliali mai nisi tulaga, o le a faatonu loa leoleo e ave lena tagata e loka i le potu taofia o le maota faamasino i Mulinuu.
Sa sologa lelei ma filemu taualumaga o lenei mataupu, lea sa auai sui o nuu ma afioaga o loo aafia i lenei faamasinoga.
O le Aso Gafua a sau ua faatulaga e aumai ai se faai’uga ma o se tasi o mataupu tau faamasinoga ua taualuga iai galuega o lenei tausaga a le Faamasinoga Maualuga.
