O ananafi lea na amata ai iloiloga a le Faamasinoga Maualalo i moliaga e 25 o le Electronic Assaults faasaga ia Perkins Feagiai Headle Tauvao poo Salote Syrah Tautai  o se tamaitai Samoa e aumau i Amerika.

E tolu aso ua faatulaga e suesueina ai mau o lea mataupu, ma e tusa ma le toavalu molimau ua faamautu atu e le itu a leoleo o le a valaauina.

I le molimau lona lua i le aso ananafi o le alii faasalalau i le EFKS TV le Susuga Tapuala Levasa Oloapu mai le afioaga o Vaisala, ua lata i le 6 tausaga o avea ai ma alii faasalalau fai polokalame i le EFKS TV. Ua faaipoipo ma e toatasi lona afafine.

Na ia faailoa i le faamasinoga o laua ma le Alii Minisita o Faatoaga ma Faigafaiva ia Laaulialemalietoa na valaaulia mai le fu’a a Carson i California o ni malo faaaloalogia i lea faamoemoe. O le ala lea na malaga ai ma o la taitoalua e auai mo le lata i le fā vaiaso.

O le mae’a ai o le fu’a na toe taliu mai ai ma sa ui mai le vaa i Fiti ma malolo ai e pei foi ona sa malaga atu ai. Sa latou feiloai ai ma le tamaitai o loo molia nei o ia ma lona tuagane.

Sa feiloai atu ia te ia i luga o le vaa lona tuagane ae faatoa la feiloai ma Perkins i Fiti ina ua malolo e faatali le foi mai o le vaa i Samoa.

Na faailoa e Tapuala sa faailoa atu e le tamaitai ua molia lona igoa ma lana tala e faapea o ia lea e sili ona faifai mai i le la polokalame o le Soalepule. 

Sa ia faailoa foi e lei alu lava iai lona mafaufau i lea talanoaga sa fai i Fiti, na te lei iloa foi e matuia ma ogaoga ni faaupuga o oo iai i luga o faasalalauga.

Sa ia faailoa foi na pue e le tuagane o lea tamaitai lo latou ata o ia ma lona toalua ma lona afafine na latou malaga faapea ai lē o loo molia nei.

Na malolo le faamasinoga ina ua lē talia ai le tuuina atu o le ata na pueina e faamaonia mai e lē na molimau, i tulaga e le o iai lē na pueina le ata ma na saunoa le Tamaitai Faamasino ia Alalatoa Rosella Papalii e le o maua le tagata tonu na pueina le ata ina ia molimau mai e faamaonia ai peitai o lea na aumai le ata mai luga o le facebook, ma e tele lava tulaga e mafai ai e soo se tagata ona tuuina se ata faapea i luga ma aumai ai loa i lalo e fai ma mau.

Sa faailoa foi e le alii loia o loo tulai mo le tamaitai ua molia, o le ata e mai se tasi page ma ua taumafai le itu tagi e faafesootai iai lē ua molia i se fake page o loo ia teena.

Ina ua toe foi atu le faamasinoga poo le ta o le 2 i le aoauli sa faaauauina le molimau a Tapuala ma poloaia ai e le Tamaitai Faamasino ina ia tolaulau uma tala sa faia faasaga i le Tamaitai Palemia faapea ai le Alii Minisita o Faatoaga ma Faigafaiva ia Laaulialemalietoa Leuatea Polataivao Schmidt.

Sa teena e le loia a le tamaitai o loo molia peitai sa faia pea le faatonuga a le Tamaitai Faamasino ma sa faafofoga le faamasinoga i le ogaoga o faaupuga sa tuuina i le facebook lea o loo ua faatulai ai moliaga e pei ona iai le mataupu lenei.

O le asō o le a faaauau ai lenei faamasinoga i nisi o molimau a leoleo.