E 46 tausaga le matua o se tama mai Pu’apu’a i Savaii ua faailoa e le Komesina o leoleo falepuipui ma le ola toe fuataina, na maliu i se faalavelave na tupu i luga o le va’a la’u pasese o le Samoa Express i le Aso Faraile na te’a nei.
I se talanoaga ma le Komesina le susuga Aupaau Logoitino Filipo i le telefoni, na ia faailoa ai ua molia se alii talavou 16 tausaga i le ave taavale faatalale ma le faatamala ua mafua ai le maliu o lea tama.
Faaalia e Auapaau o lipoti mai Savaii ua faailoa atu ai i leoleo, o le ua maliu sa moe i lalo o le loli o se kiliva, ma o le taimi ua taunuu le vaa i le uafu i Salelologa ma ua amata ona ese taavale na tupu ai le faalavelave.
Faaalia e le Komesina o leoleo na faaola le loli e le ua molia nei, ma alu ese ma le vaa ae o loo moe pea lē ua maliu i lalo o le taavale. O loo iai molimau e faatoa faamautu pe a mae’a suesuega a leoleo e faapea sa faasuava lē ua maliu.
I le tiute a leoleo a o tapuaia e le atunuu le taaloga a le Toa Samoa i le faaiuga o le vaiaso, ua faailoa e le Komesina sa sologa lelei mea uma seia vagana nisi o aiga sa agai iai le galuega a Malu o le Malo ona o faasea i le pisapisao o nisi o aiga tuaoi sa fai a latou fiafia i le po o le Aso Toonai ma faatalitali le taimi o le taaloga i le vaveao o le Aso Sa.
E iai tagata na molia i le ave taavale ma tagofia le avamalosi i poloka a leoleo faapea nisi sa taofia ma molia ona o le onana i nofoaga faitele.
