Ua faatonu e le pulega a le soifua maloloina le Te Whatu Ora le faia o se iloiloga e suesue ai pe aisea na motusia faafuasei ai le eletise i le falemai i Kalaiesetete.
E toeititi itula atoa lea na pogisa ai le falemai i Kalaiesetete i le po o le Aso Faraile faatoa mavae atu nei, ma e faapea e lei ola foi ma le afi faaleoleo.
O le mea e faafetaia ai ona sa saogalemu uma le 478 gasegase e aofia ai le 96 sa i le emergency department.
Ua lipotia e le Herald o lea na togafitia lava nisi o gasegase i le pogisa, e ui ina pepē le ea malulu, pepē uma telefoni, masini komepiuta faapea nisi o masini e faaaoga e gasegase.
E iai le gasegase e toatasi e faatoa uma lava lona taotoga ae motusia loa ma le eletise, ma i le taimi lea ua faasauni atu le isi gasegase peitai o ia la lena sa toe tolopo.
O le iloiloga ua faatonu e le pulega o loo fesiligia ai pe aisea na le otomeki ai ona ola le afi faaleoleo.
