O le tagi o loo su ai e lē sa avea ma Loia Sili le afioga Savalenoa Mareva Betham Annandale, le Loia Sili a le Malo ma le tamaitai Palemia le afioga Fiame Naomi Mataafa, e pei ona finau ai e soli faavae le faaiuga na faamuta ai lona tauaveina o lea tofiga, ua faatulaga e toe valaau i le aso 30 o Ianuari o le tausaga fou.

Ua faailoa i taualumaga o lenei mataupu, o le toe tuu atu i le masina fou e fofogaina ai, o le a soalaupule ai nisi o tapenaga faaletulafono a itu auai, ma faamautu ai foi le maliega a loia e fofogaina faatasi talosaga e lua a le itu tagi e aofia ai se finauga faasino lea i se taui ma faamanuiaga tau totogi mo lē ua talosaga.

E pei ona silafia o le faamutaina o le taimi galue o Savalenoa Mareva i se faaiuga a le Malo, e mafua ina ua le faatuatuaina, a o feagai lo tatou atunuu ma tulaga le mautonu i upufai o Malo.