O loo suesue nei e le NZ Rugby se mataupu e aofia ai le alia’e o se ata na faasoa i luga o upega tafailagi ua iloa atu ai le ata o se pauta paepae o loo i luga o le talita a Ranfurly lea na lipotia ua gaulua se’i tulou. 

O le talita na manumalo ai Hawkes Bay ia Ueligitone i le Aso Toonai, fai mai na gaulua le talita ma faaleagaina ma o loo faaupu o se faalavelave na tupu faafusei, accident a le Iuni lakapi a Hawkes Bay. 

O loo faailoa i le ata le pauta paepae lea i luga o le talita ma le faamatalaga a le ofisa sili o le iuni Jay Campbell e faapea o le talita lea sa gau ona sa pa’ū ese i luga o se foloa sima i le mae’a o le fiafia a le kalapu.

O ata la na tuuina ae e nisi i le RNZ ua vaaaia foi ma le isi alii aalo o le All Blacks Folau Fakatava o loo ia uuina vaega o le talita ua faleagaina ae mulimuli vaaia ai ma se ata o le pauta paepae.

O se tulaga ua faailoa ai le lē fiafia o le pule o le NZ Rugby, Steve Lancaster ma ia faailoa ai o loo latou iloa foi nisi o ata ua i luga o le social media ma ua faia ai nei loa iai ma le suesuega.

Fai mai le NZ Rugby o le a amata ona toe lipea le talita ma toe faatulaga ona toe silasila lea i faiga faavae o iai ma o se tulaga faanoanoa ae ui i lea o le tulaga na tulai mai o se faalavelave na tupu faafuasei.