Ua amata alia’e mai faitioga ma manatu faaalia o tagata i se mataupu ua ta’ua e faapea ua toeititi atoa le tausaga o fai le amio a le tagata i le tuuina lea o sosisi i totonu o le pusameli a lo latou aiga.
E faapea se faamatalaga e matuai fai lelei lava le sosisi ma le falaoa tuu iai ma le tomato sauce e pei ona fai ai sausage sizzle ona tuuina lea i pusameli a tagata.
Fai mai le molimau a nisi i Waiheke lea o loo tulai mai ai lea mataupu, e tai faatasi i le masina ona vaaia lea tulaga peitai ina ua maitauina e tagata o loo aumau ai i lea faaitu, e fai si toatele o aiga o loo aafia ai, ua amata maitauina ai e foliga o se faafitauli tele ma ua amata fevaevaeai ai foi nisi o faatasiga ma faigauo ona o masaloga faapea ai na faatino e nisi lava o latou.
Fai mai i latou ua faailoaina lautele le mataupu lea ua oo i le aufaasalalau, o se lapataiga i le tagata o loo fiafia e fai le gaioiga lea, o le a iai lava le taimi e maua ai ma faailoa i tagata uma le o loo faia lea tulaga le manuia.
Ua ta’ua i le lipoti o le pule o le The Mad Butcher o Sir Peter Leitch lea foi e nofo i Waiheke, na te lei faalogo muamua i lea mataupu ma e lei aafia ai foi o ia.
