Ua faamaonia le moliaga e tasi o le faia o se gaioiga faaalatua ma le faamoemoe e faatosina ai se tagata palota na faaaogā ai se tinoitupe e $150 tālā, ma ua taunuu ai le faamasinoga o palota i lana faai’uga e soloia ma faalēaogāina le nofoa o le itumalo o Falealili 1 lea sa filifilia iai le afioga Toelupe Maoiautele Poumulinuku Onesemo sa tauaveina le tofi Minisita ma le tasi o tofi Sui Palemia o le malo.
O le Aso Lua na fofogaina ai lea faai’uga o le faamasinoga sa tauaveina e le afioga i le Faamasino Sili le afioga Satiu Simativa Perese, ma le afioga i le faamasino le susuga Leiataualesa Darrel Clarke.
Ua tapena le lipoti a le faamasinoga o palota e tuuina atu i le Fofoga Fetalai o le Palemene e logoina ai le taunuuga o lea tagi o le palota, ma o le taualuga foi lea o matāupu uma e māfua mai i moliaga o faiga solitulafono a o faagasolo tapenaga o le palota tele a le atunuu sa faia ia Aokuso o le tausaga ua mavae.
