Ua umi tele ona faitau palota faapitoa o le faigapalota tele a Niu Sila, ma a o faatali ai o lea o loo sologa manuia feutanaiga ma isi pati e ala i le osia o le isi faigamalo fou.
O se tala mai lea a le taitai o le National, Christopher Luxon i le taeao nei i luga o le Newstalk ZB, ma e ui o loo natia i le taimi nei talanoaga o loo faia i le va o le National ma pati a le ACT faapea le NZ First, ae ua polomisi mai Luxon e uma lava faailoa faalauaitele mai i tua.
Ae i lona talitonuga i le umi o loo faitau ai palota, o le tolu vaiaso ua umi tele ma e sili atu ia Luxon le lua vaiaso na iai muamua a o lei toe faaopoopo le isi vaiaso lea ua tolu iai vaiaso ona o tagata faatoa lesitala i le aso o le palota.
A o tālia le faaiuga aloaia o le faigapalota tele e aofia ai ma le faitauina o palota faapitoa, o loo masalomia e ono toe mamulu isi nofoa a le National ma o lea e na te moomia ai pea le lagolago a le ACT faapea le NZ First e osi ai se faigamalo.
Ua lipotia o lea ua faia nei i Aukilani feutanaiga i le va o pati, poo le aai o loo nonofo uma ai taitai o pati e tolu, Christopher Luxon, Winston Peters faapea ai ma David Seymour.
