Ua amata tuli nei le faasalaga soloatoa i le falepuipui o le taulealea 27 tausaga le matua o Kiuma Talouli Levi ina ua faamaonia lona ioeina o le solitulafono o lona faaoo o le maliu i se tamaitiiti 12 tausaga le matua.
O le Aso Lulu o le vaiaso nei i le Faamasinoga Maualuga na aumai ai lea faai’uga a le faamasino le afioga Fepuleai Ameperosa Roma, a o nofo taofia i le falepuipui lē ua faasalaina e faatali ai le faasalaga.
O Aokuso o le tausaga na te’a nei i Salelavalu i Savaii na faatino ai e Kiuma Talouli Levi le solitulafono, sa ia umia ai se ‘au’upega o le laau malosi o le ituaiga o le 22 poo le pulutasi.
Sa faaalia e leoleo na faatino le solitulafono a o moe le tamaitiiti i totonu o le ta’inamu i le po.
Sa faailoa ai e le Komesina o leoleo i lea taimi sa masalomia o se solitulafono na māfua ona o se faigauo a lē ua nofosala ma le tuafafine o le tamaitiiti ua maliu.
