O le asō lea ua faataunuu ai le solo tetee a tausi soifua ma faatosaga e pei ona folafola mai le vaiaso talu ai ma ua vaaia i le asō le faitau afe o i latou ia i faatasiga i Sini e finauina o latou totogi ma nisi o tulaga tau galuega e fia faaleleia.
O isi foi vaega o le setete o Niu Sa Uelese lea o loo faagasolo ai foi mai lava i le ta o le fitu i le taeao analeila.
Fai mai a latou i le taimi o le latou tetee lea o le a faatumauina pea le latou auaunaga i falemai lautele ma auaunaga tau le soifua maloloina aemaise lava i tulaga e manaomia ona faatino ai a latou galuega mo le laveaiina o soifua o tagata.
O le tetee ina ia talosagaina ai pea le premier ina ia silasila ia latou talosaga ma ia faaleleia tulaga o auaunaga e ala i le faaopoopo o tagata faigaluega.
Ta’ua e le sui failautusi o le asosi o Michael Whaites o nisi o le aufaigaluega ua le lavavā feagai ma nei tulaga ma ua agai atu i isi setete e faigaluega ai ma ua le fiafia sui o le asosi aemaise o le tele o le tomai ma le silafia i le faatinoina o le auaunaga, ua lusi atu ai ma le lē maua o se tonu lelei o lenei mataupu.
