O se tagata na sola mai i tua mai le falepuipui ua maua ua maliu atoa ai ma le isi tagata o loo faamanualia i se faalavelave i Hobart.
Faailoa mai i tala a le 9news i le aso ananafi o lē sa falepuipui sa togafitia i lalo le vaaiga a leoleo falepuipui i le Royal Hobart hospital ma na sola i le lata i le 12 i le po o le Aso Gafua e pei ona faamaonia mai e leoleo mai Tasmania.
Fai mai o le latati le ‘afa o le tasi i le vaveao na faalogoina ai le pa ane o se fana i se fale i Black Snake Rd i Granton ma e taunuu atu leoleo ma o latou maua ai le tino maliu o se tasi alii i fafo ane o le fale ma le isi o loo i totonu o le fale o loo iai foi manuaga i lona ulu.
Fai mai na faamaonia ai loa o lē ua maliu o le tagata lea na sola ese mai le falepuipui i le po lava o le Aso Gafua.
O le aso ananafi na faatalanoa ai e leoleo le tagata lea na maua o manua ma o loo faia suesuega pe na faapefea ona sola ese mai lē ua maliu mai le falepuipui ae o le a foi le mafuaaga o le vevesi.
