Na faatino tiute masani o nisi o leoleo e tiute i le maota faamasino i Mulinuu ma nisi o leoleo o le falepuipui e ave tagata taofia mo a latou mataupu tau faamasinoga, ae na mafai ona sola ese ai se tasi o taofia o se tasi ua tele ni ona moliaga ua faamaonia i ni solitulafono tau talepe fale ma le gaoi.

O le Aso Gafua o le vaiaso nei na tulai mai ai lea faaletonu ina ua taunuu le pasi e momoli atu ai taofia i le faamasinoga i Mulinuu, ma ua faia ai nei se suesuega pe na faapefea ona sao le gaioiga a Daniel Vailopa e faapea na alu ese ma le pasi i le taimi na taunuu ai i le vaega o le fale faamasino i Mulinuu e masani ona agai ai taofia i le potu e faatali ai le taimi e ave ai i potu o le fale faamasino.

Ua lipotia e le nusipepa o le Samoa Observer se finagalo o le Komesina o leoleo, falepuipui ma le toe fuata’ina ua ia faailoa ai le faatamala o leoleo ma le vaega o leoleo o le falepuipui sa tiute i le Aso Gafua i le maota faamasino i le mafai ona tupu o lea tulaga ae o loo iai i latou e vaaia tagata taofia e avatu io latou faamasinoga.

O le taofia na sola o se tasi sa tuli foi ona faasalaga faafalepuipui, ae o lana gaioiga na sola ese ai na mafai ona toe maua e leoleo ma momoli i le falepuipui i Tanumalala.

O moliaga o le talepe fale ma le gaoi ma le toso teine sa tatau ona tulai ai Daniel Vailopa i le Aso Gafua, ae e lei mafai ona faatino lea tulaga ona o lana gaioiga na sola ese ai.