I le tūiga o loo faagasolo nei mo fanau mai le 5-11 tausaga le matutua o lea ua silia i le 7,000 ua maua o latou tui ae o le aofaiga atoa o fanau i lea matutua e tatau ona faia o latou tui puipui o le Koviti19 e 42,000.
O loo iai le fuafuaga e tatau ona oo atu i le faaiuga o le masina nei ua faasopolia lea aofaiga mo Upolu faapea le motu tele i Salafai.
E pei ona silafia na amata faatino lea unai mo tui puipui a fanau laiti mai le 5-11 tausaga le matutua i totonu o Aoga tulaga lua i Upolu lea e oo atu i le 15 aoga ua agai iai le faatinoga o nei galuega a le aufaigaluega a le Soifua Maloloina.
O le vaiaso nei lea na alu ai se asiasiga a le taitai o le atunuu le Tamaitai Palemia Faime Naomi Mataafa i nisi o Aoga o loo agai ai le faia o tui puipui. I lea asiasiga na ave ai le faamalosiau a le Palemia i matua uma ina ia faia tui puipui o fanau laiti mo lo latou saogalemu mai le pepesi ai o le faama’i Koviti19.
