O lea ua ‘afa le tausaga o faatali pea tagata Aukilani na faaleagaina fale e le afā o Garbrielle.
E silia ma le selau aiga na aveesea mai Muriwai ona ua faaleagaina fale ma i la latou feiloaiga i le Aso Toonai faatoa uma atu ua fai mai e leai lava ni suiga tele ma ua moomia ai se tali mautu.
O le toatele o aiga nei o loo faatali pea i faaiuga o suesuega o loo faia e iloa ai pe mafai pea ona nonofo i fale ua faaleagaina pe a o ese.
Ae mai le Auckland Council, e le o mafai ona mautinoa mai le tali o lea fesili ona o lea lava e faia suesuega ma e lē faigofie.
Ae mai aiga Muriwai ua lē iloa le sa’o, o lea foi na fai mai e faamae’a iloiloga o le buyout poo le faiga o le a faatau ese ai e le malo fale ua faaleagaina i le faaiuga o Iuni ae o lea ua ‘afa Aokuso e leai se tala.
O Hawke’s Bay ma Muriwai lea na tigaina i le afā, ma e foliga mai o Hawkes lea ua mae’a vaevaeina le faatulagana o fale a o Aukilani o loo faatali pea.
