E ui ua fautuaina mai le lagi lelei i nisi o vaega o le setete o Niu Sa Uelese ae o loo lapataia pea tagata ina ia faaeteete i lologa ona o loo vaaia pea le siitia o le tatafe o vaitafe i isi vaega o le atunuu.
O le taimi nei tusa e 11 faaitu o loo ua tuuina iai poloaiga e agai ese ai ma nofoaga o loo aumau ai ona o puipuiga mo le saogalemu.
Ua unaia tagata ia silasila i le upega tafailagi a le SES mo se lipoti lata mai ma silasila i lapataiga i taulaga ma faaitu eseese o le setete.
Fai mai e silia ma le afe talosaga mo ni fesoasoani sa valaau atu i le SES mai le Aso Faraile o le vaiaso talu ai ae faafetai le toatele ona o le le taunuu o nisi o lapataiga mo timuga mamafa sa lapataia i le agai atu i le faaiuga o le vaiaso na tea nei.
