O loo faasolo pea su’esu’ega a leoleo i se faalavelave na alia’e mai i Sanson i Manuwatū.
O se afi na faatama’ia ai se fale ma o lea na maliliu ai ni fanauiti se to’atolu ma lo latou tamā.
E tusa ai ma lipoti a le leitio faavaomalo a Niu Sila, o loo iai masalosaloga o se gaioiga na faia ma le loto iai, o le fasioti tagata pule i le ola tulou.
Ae ui i nei masalosaloga o loo tālia se tala aloa’ia mai le auaunaga e tusa ai ma māfua’aga ma tulaga uma o lenei faalavelave.
O loo iai le malamalamaga o le tamā ua aafia e suafa ia Dean Field, a o fanauiti o loo māua, o le ulumatua o August e 7 tausaga le matua, o Hugo e 5 tausaga le matua, ma le ui’i o Goldie e 1 le tausaga le matua.
Faamauina i sa’ili’iliga, na maua le aafia o nai fanau i le afi, pe na mū, se’i vaganā ai le tamā.
O le to’alua o fanauiti na maua o la tino i le Aso Sa, ma o lea lava na faatino se sauniga mo nai nei fanau, ae o le tamaitiiti lona tolu na maua i le Aso Gafua.
Faamanino e le Ta’ita’i Leoleo Asiasi o loo faauluulu iai lenei matāupu, Police Area Commander Inspector Ross Grantham, e tele ni aso o taumafai e faatino sa’ili’iliga maumaututū i le fale ona o le tulaga lē mautū ua iai le fale ona o le mū.
E ui i ni masalosaloga ma tala feavea’i, ae e lē o mailoa poo se tulaga na mafaufau iai lē ua aafia ma maliu e faatino lea tulaga o le susunuina o le fale.
Ta’ua o se tagata na faimalaga atu i lea faaitu na iloa atu le fale ua mū, ma o lea na ia faafesoota’i loa le auaunaga o faalavelave faafuase’i.
Faamauina le iai pea o leoleo i lea nofoaga mo aso a sau auā a latou su’esu’ega.
Ae ua faaalia le faatino ai o se sa’iliga tupe e ala i luga o upega tafa’ilagi o le Givealittle, o foa’i mai tagata lautele mo le tinā ua motusia faafuase’i le mafutaga ma si ana fanau ma lona to’alua.
Faamauina e silia ma le $250,000 le tupe na foa’i e ala i lenei itulau mo le tinā loto faavauvau.
Puna o Faamatalaga: https://www.rnz.co.nz/news/national/579183/the-hardest-journey-possible-250-000-raised-for-mother-of-children-killed-in-sanson-fire
