E lua fale tetele i Ukraine sa agai iai osofaiga a Lusia i le po anapo ma e silia ma le 20 ua maliliu ai, e aofia ai ma tamaiti e toatolu.
O le itu i sisifo o Ukraine lea na osofai ma ua vave sauni ai ma vaalele tau a le NATO i tuaoi o Ukraine o Poland ma Romania.
Fai mai le CNN o le aai e igoa o Ternopil lea na osofaia ma e lata i le 100 le au manunu’a e aofia ai tamaiti e 18.
Ta’ua e le Minisita o mataupu faalotoifale a Ukraine, e iai tagata o loo tau sailia pea talu mai le osofaiga lea ma faailoa foi e le Peresitene o Vlodymyr Zelensky e oo mai i le taimi nei o loo faatino pea sailiga ma galuega laveai mo nisi o loo tanumia ma ua ia toe una’ia ai ana paaga ina ia faamalosi atu le latou finau ia Lusia ia faamuta ia le vevesi ae ia maua se filemu.
Ua faailoa foi e le CNN o loo iai lipoti ua maua o loo galue Amerika e tuufaatasi se fuafuaga mo se filemu ma Lusia ina ia faamuta ai loa le taua lea i Ukraine.
Talu mai le amataga o le taua lea o le itu i sisifo lava o Ukraine e osofai e Lusia peitai o le osofaiga lea anapo sa sau mai le itu i saute, manatu ai le toatele e foliga ua ese le itu o le a faatūtu iai ia osofaiga a Lusia.
Puna o Faamatalaga: https://edition.cnn.com/2025/11/18/europe/poland-fighter-jets-russia-ukraine-intl-hnk
