O le unaia o tamaitai i le itu tau taaloga o se vaaiga lea o loo atinae pea i le tele o taaloga o loo faatino i le atunuu.

O le ‘au filifilia a Samoa mo taaloga o le Pasefika o loo iai se fuainumera tele o tamaitai o le a tauaveina le tagavai o le atunuu i taaloga i Solomona e pei ona faaalia e le Peresitene o le Komiti o Asosi o Taaloga a Samoa Pauga Talalelei Pauga.

“O le fiafiaga o lea ua vaai i le tele o a tatou team sports lea o loo iai ‘au a alii faapea foi ma ‘au a tamaitai o loo iai lava le paleni o avanoa tutusa.

“O le tele foi o a tatou individual sports o lea foi e iai ma le numera o tamaitai i totonu.”

Ta’ua e Pauga o se faiga lelei lea mo le ‘au a Samoa o le paleni lea i itu e lua ma le siitia ai o le atinaeina o tamaitai i taaloga.

O le aso a taeao lea o le a faataunuu ai se savali a le ‘au a Samoa i lumāmaota o le Malo i Matagialalua e faatino ai se sauniga e faamanuia ai taumafaiga o le a alo atu iai le alo o le atunuu i Solomona.

O le aso 15 o le masina nei lea o loo fuafua ai le faigamalaga muamua a le ‘au mo taaloga o le Pasefika.