O le gasegase o le TB poo le Tuberculosis poo le māmāpala tulou, ua faailoa i lipoti i le asō ua faamauina e le WHO poo le faalapotopotoga o le Soifua Mālōlōina o le lalolagi, o le gasegase aupito to’atele lea tagata ua aafia ai ua oo atu i le 10.8 miliona tagata aafia ai i le 2023 ma le 1.25 miliona o tagata ua maliliu ai.
Ua ta’ua e le 9News o lea ituaiga gasegase e pepesi i le ea aemaise pe afai e tale pe tautala foi se tagata o loo aafia.
O loo togafitia i le taimi nei i fuālaautui poo antibiotics na faia i le vaitau o le 1950 ma le 1960.
Peitai ua maitauina e le ausu’esu’e o loo iai sina siama e mafua ai le gasegase ua iai ni suiga ma ua lē toe aogā ai vailaau sa togafitia ai muamua.
O le gasegase o le TB e aafia ai māmā o le tagata ma e faigofie ona pepesi le siama lea pe afai e tale, fogi le isu tulou pe pese foi pe tautala le tagata o loo aafia.
E mafai ai e ni nai vaega o lea siama ona sao atu i le ea o loo mānava e tagata ma aafia atu ai foi.
Fai mai le WHO e mana’omia le malamalamaga fou ma faiga faavae e fesoasoani ai i le faalauteleina o se togafitiga ma vave le gaioi ina ia maua se togafiti.
Puna o Faamatalaga: https://www.9news.com.au/national/tuberculosis-surge-deadly-disease-overtakes-covid19-as-leading-global-infectious-killer/168e1782-787b-4622-bac8-596f401ade45
