Ua lē fiafia le au aveloli i le faaopopo o le Heavy Vehicle User charge poo le totogi o le faaaogaina o loli tetele lea fai mai a latou o le a atili ai ona faaopoopo lu’itau i le tulaga o tupe maua lea o loo i se tulaga pagatia i le taimi nei.
O le fuafuaga a le Federal Government poo le faigamalo o iai nei ina ia siitia le toll lea mai le 27.2 sene i le 32.4 sene i le lita o le kiso e faaaoga e loli e amata i le 2025, fai mai aveloli o se faiga o le a faasolosolo ina faalogoina aafiaga mai lea taimi i lea taimi.
Na faailoa le manatu o nisi o aveloli i le aufaasalalau, o le tele lava o galuega e faatino e le au fai loli o le tele foi lea o lafoga e faaopoopo ane mo latou.
Na o latou ta’ua foi o le taimi nei ua faaluaina le tau o le kiso o loo latou totogiina pe a faatusa i le taimi faapenei i le tausaga talu ai.
E molimau aveloli o lenei siitaga ua faaopoopo atu i tolls o loo totogi, inisiua ma le lesitala o loli ma e oo atu i le afe i le vaiaso le tupe e totogi i vaiaso uma i mea manaomia mo le faagaioia o loli ma ua faasolo lava ina oo i se tulaga faigata ma ono faamuta ai le auaunaga.
Ina ua fesiligia e le autusitala nisi o i latou ia pe iai se fesoasoani na maua ane i le tala faatatau o le tupe ua mae’a folasia, na o latou faailoa e leai se fesoasoani ma ua sili mamao ai ona toe foi e feola i le penefiti.
