O le vaitau o le tausaga e 1970 pe tusa o le 50 tausaga ua mavae, na fausia muamua ai le uafu i Satitoa i le faigamalo i lena taimi, peitai o le 20 tausaga mulimuli ane ai, e le’i faaaogāina ma goto uga ai tupe a le Malo na faaalu ai.
O le tuanai o lea 20 tausaga i le faigamalo i lea vaitau na toe a’e ai se finagalo e fausia le uafu ma taunuu ai loa ina faaaogā mo malaga i le va o Samoa ma Amerika Samoa, peitai na alu alu fausia ai ma le nofoaga toso vaa lea e le’i tele ni tausaga na faaaogā ai ae nofo ua lē toe faagaioia, ma faapena ai foi ona lē toe faaaogāina le uafu i ni malaga faavaomalo.
Talu mai lena taimi e oo mai i le taimi nei ua tūtū ai pea le uafu i Satitoa ua lē toe faaaogāina, ae o lea ua iai se silasila mamao a le Matagaluega o Galuega tetele e aofia ai ma le vaaia o le pulega o uafu e faaaogā lea nofoaga e fausia ai se mariner poo se nofoaga e taula iai vaa failā. Ua faailoa lea fuafuaga e le Minisita o Galuega Tetele a le Malo ma le Pulega o Uafu le tofa Olo Afoa Fiti Vaai.
O se tasi o fuafuaga ua faamanino e le Minisita o Galuega tetele ma le pulega o uafu, o le vaa fou mo malaga i le va o Apia ma Pago Pago, lea ua faamautu i sana malaga talu ai nei i le atunuu o Iapani o loo faatupeina le fausia o lea vaa la’upasese ua faaigoa o le Lady Samoa IV, ae ua lē toe faaigoaina o le Lady Naomi.
Le Minisita o Galuega Tetele ma le pulega o uafu, le faalapotopotoga o vaa a Samoa, le malosi tau eletise, vaalele sivili ma le pulega o malaevaalele le tofa Olo Afoa Fiti Vaai.
