O le tauave ai pea e pulega malo mai lea taimi i lea taimi o le polokalame fesoasoani o loo faatupe ai e le malo togafitiga o nisi o gasegase i atunuu e mamao e pei ona faia ia togafitiga i Niu Sila ma Initia, ua faailoa e le Sui Palemia i le feiloa’iga ta’i vaiaso ma tusitala ma le aufaasalalau i le atunuu, le faamaonia ai e le Kapeneta i le vaiaso ua mavae o nisi o gasegase e auina atu i fafo mo sa’iliga togafiti ona e lē o mafai ona faia ni togafitiga i Samoa.
O se polokalame fesoasoani a lo tatou malo e pei ona silafia o loo totogi ai togafitiga o le gasegase, ae totogi e le aiga le pasese o le gasegase i le alu ma le toe foi mai, e faapena foi i le pasese o le tagata e tauto’aluaina le gasegase.
O le ave i Niu Sila o se gasegase mo togafitiga i lalo o lea polokalame e faalagolago ai i aiga i Niu Sila mo le vaaia i le itu i le tausiga o le tino, fale e faamautū ai ma isi lavelave o tapenaga e pei o taavale e feoa’i ai aga’i i le falema’i.
Sa fesiligia le Sui Palemia pe ua lē alagātatau ona toe iloilo ta’iala o lea polokalame fesoasoani ina ia silasila i se fesoasoani a o faamautū ai i Niu Sila se siiga gasegase i lalo o lea polokalame a le malo.
Audio cut : DPM
Le Sui Palemia afioga Toelupe Maoiautele Poumulinuku Onesemo.
