O le faaiuga a le faamasinoga o palota ua faatumau ai le filifilia o le sui faipule o Vaimauga 3 le afioga Lautimu’ia Uelese Vaai, ina ua soloia ma faaleaogaina moliaga o faiga faatosina ma le faamoemoe e faatosina ai tagata palota ina ua leai ni mau e lagolago ai le tagi na faaulu e Samau Leatigagaeono Solitamalii.
Ua silasila ai nei lea faamasinoga a le atunuu e faataatia se alafua e faatulaga ai mafuaaga o se tagi tau palota, ina ia le toe faama’umauina le taimi o le faamasinoga i le lumanai e tagofia ai ni tagi e faia ai ni moliaga e faasino i mataupu ua mae’a ona suesueina ma faia iai faaiuga, e patino tonu i gaioiga e aafia ai tu ma aganuu faasamoa.
Sa tuuaia e lē na tagi le vaega faaupufai o le faatuatua Samoa ua Tasi i lana faalauiloa a o loma le palota laititi a Vaimauga 3, i le lima afe tala na ave i le itumalo ma le afioaga o Magiagi na faia ai le faalauiloa a le pati faaupufai, ona o se gaioiga ua faatosina ai tagata palota.
O le lima afe tala e pei ona folasia i le taimi o suesuega o molimau, o le faaaloalo lea a le vaega faaupufai e tali atu ai i le faaaloalo a le nuu ma le itumalo ia latou faaaloaloga o le sua faatamalii mo le taitai ma sui o le vaega faaupufai faapea ona sui lagolago sa auai i le faalauiloa poo le roadshow.
O le silasila a le faamasinoga e faataatia se alafua i le lumanai mo nisi tagi tau palota, o le a faasaoina ai le taimi o le faamasinoga i le toe tagofia o ni mataupu i ni moliaga ua faia iai faaiuga, ma o le a faaaogā tatau ai le taimi o le faamasinoga e suesueina isi mataupu o loo faatō’ai atu mo ni iloiloga ma ni faaiuga.
Ua manatu foi le faamasinoga o se faiga o le a silasila ai foi e tuuina atu ni totogi i ni itu tau faamasinoga pe afai o le a toe iai ni tagi tau palota e le tausisia ni taiala o le a faataoto mai.
Ua faaleaoga ma soloia le tagi tau palota ma ua faapena foi ona faaleaogaina moliaga a le sui faipule o Vaimauga 3 na tuuaia ai le na faauluina le tagi, ona ua faaalia e le faamasinoga e leai ma ni mau e lagolago ai moliaga uma a itu e lua e aunoa ma ni masalosaloga tatau.
O le mae’a ona lau le faaiuga i le Aso Faraile na tea nei, na maua ai se avanoa e fesiligia ai le afioga Lautimuia Uelese Vaai e tusa o le taunuuga o le tagi tau palota, ma sona finagalo i le tulaga ua faailoa e le faamasinoga i lana faaiuga, aemaise o sona finagalo i le tapuaiga a le itumalo.
Le afioga Lautimuia Uelese Vaai, o le sui faipule filifilia o Vaimauga 3.
O le taunuuga o le tagi tau palota a lea itumalo, ua umia ai e le vaega faaupufai o le faatuatua i le Atua Samoa ua tasi nofoa e 32, vaega e puipuia aiātatau a tagata e 18 nofoa, ma sui faipule e toatolu ua faamavae ma lea pati faaupufai lea ua tutu taitoatasi ma o loo tālia lo latou faamasinoga e faamautu ai, pe toe foi e faia a latou palota laiti e tusa o aiaiga o le faavae ma le tulafono o faigapalota, poo le aloaia o le avea loa ma faipule tutoatasi i totonu o le Palemene.
