O se tulaga lelei o loo iai tupe faaagaga mai fafo a Samoa poo foreign reserves lea e faamoemoe iai le faatauina o oloa mai fafo, e pei ona faamauina i le lipoti a le faletupe tutotonu mo le faaiuga o le tausaga 2022 faatoa alu atu nei.
Ua faailoa i lea lipoti e ui i tulaga faaletonu toe maaleale sa iai le tamaoaiga talu mai ona faamalosia puipuiga o le atunuu ona o le faamai Koviti-19, e mae’a ane le tausaga na tea nei ua 812 miliona 7 selau afe ma ona tupu tala le aofaiga o tupe faagaga mai fafo, ma o se aofaiga ua siitia ai i le 300 miliona tala pe a faatusa i le tausaga 2018 i le 2019 na faamauina ai le 490 miliona 7 selau afe ma ona tupu o tupe teu faagaga i fafo a lo tatou atunuu.
O se tulaga maoa’e na molimauina i le siitia pea o tupe faamomoli mai fafo ma tupe faameaalofa mai paaga a le Malo o Samoa o loo latou galulue faatasi ma o se isi lea tulaga lelei i le faatupeina o manaoga o tala faatatau o tupe a le malo mo galuega faatino o le atiina a’e o le tamaoaiga o le atunuu.
O tupe maua foi mai galuega faavaitaimi ua faapena ona siitia e mafua i le faaopoopoina o tagata mai Samoa e manaomia mo ia galuega i Niu Sila ma Ausetalia.
O le masina lenei o Ianuari o le a faatino ai se fuafuaga e taofia lē tumau le toe auina atu o nisi mo ia galuega, ona o se fuafuaga e faataoto ni alafua lelei mo le filifilia o tagata mo galuega faavaitaimi.
