O loo faaauau pea ona siitia le tele o tau o oloa i le lalolagi e aofia ai ma le suauu ona o le faaauau ai pea le siitaua taua atu o Lusia i le Mālo o Ukraine ae le gata i lea o le sasa a le faama’i Koviti-19 ua aafia ai le lalolagi atoa.
Mo Samoa lava ia ua faailoa mai tau fou o le suauu ma le penisini o le masina fou lenei o Aperila ua leai se faaitiitia ae ua atili sii maualuga le tau.
O tau fou ua iai nei o le penisini sa $3.11 i le litre i le masina o Mati o lea ua sii maualuga nei i le $3.34 i le litre ma ua faaopoopo le 23 sene. O le suauu kiso sa $3.07 i le litre mo le masina na se’i mavae atu nei ua oo atu nei i le $3.30 i le litre. O le kalasini ua oso nei i luga le tau i le $2.87 litre faatusa atu i le tau sa iai ia Mati sa $2.67 i le litre.
Faaalia i le pepa o faasalalauga mai le Ofisa o le tamaitai Minisita o Tupe Mulipola Anarosa Ale Molioo ua faaauau pea le siitia o le tau o le suauu e le’i faamamāina ona o popolega o le a faaauau pea ona aafia le aofaiga o le suauu gaosia ona o le taua a Ukraine ma Lusia ma e tusa ma le 7% le suauu o loo gaosia e le atunuu o Lusia o loo ia tu’ipala i le taimi nei le Mālō o Ukraine i le taua ua ia faatupu ma taumafai ai e pulea faamalosi lea atunuu tuaoi.
