O le siita’i o le tau o le suāuu ua iai nei ma tuua’ia ai le taua o loo tutū faatasi ai Isaraelu ma Amerika e faasagatau i le atunuu o Iran e ‘oa ona eleele i le suāuu, ua faailoa ai e le kamupani vaalele o le Air New Zealand le taofia o ni ana malaga se fā mai Samoa mo Niu Sila i le masina fou o Aperila ma Me.
O le māfua’aga foi lea ua oso maualuga ai le totogi o pasese a lea kamupani vaalele ma faia ai ma lea faai’uga e pei ona faailoa lautele mai.
O malaga o le aso 7, 19, ma le 26 o Aperila ua lē faataunuuina faapea le malaga o le aso 4 o Me.
Ua faailoa ai e lea kamupani vaalele o pasese uma sa tusia suafa i ia faigāmalaga mai Apia mo Aukilani ua sa’ili ni avanoa i malaga a isi kamupani vaalele e faataunuu ai.
O le Qantas ma le Fiji Airways o nisi ia kamupani vaalele o loo malaga mai i Samoa.
Ua faaalia i nisi o lipoti o le taimi nei ua feagai auaunaga a kamupani vaalele i le lalolagi ma lu’itau i le oso maualuga o le tau o le suāuu o loo utu ai vaalele ma ua faia ai fetuuna’iga talafeagai e tau faafetaui ai le siitia o le tau o suāuu ona o le taua i Sasa’e Tutotonu.
